Himanshu Goyal 
ਨਗਰ ਕੌਂਸਲ ਧਨੌਲਾ ਦੇ ਨਵਨਿਯੁਕਤ ਕੌਂਸਲਰਾਂ ਨੂੰ ਲੱਖ-ਲੱਖ ਵਧਾਈ, ਨਗਰ ਦੀ ਤਰੱਕੀ ਅਤੇ ਖੁਸ਼ਹਾਲੀ ਦੀ ਆਸ
ਪ੍ਰਧਾਨਗੀ ਨੂੰ ਲੈ ਕੇ ਚਰਚਾਵਾਂ ਤੇਜ਼, ਬਹੁਮਤ ਕਾਰਨ ‘ਆਪ’ ਦੀ ਲਗਭਗ ਤਹਿ
ਧਰਮਿੰਦਰ ਧੰਨਾ, ਹਰਵਿੰਦਰ ਫਤਹਿ ਸਮੇਤ ਕਈ ਚਿਹਰਿਆਂ ਦੇ ਨਾਮ ਚਰਚਾ ਵਿੱਚ, ਨੌਜਵਾਨ ਆਗੂਆਂ ਨੂੰ ਮੌਕਾ ਦੇਣ ਦੀ ਚਰਚਾ
ਧਨੌਲਾ, 29 ਮਈ (ਹਿਮਾਂਸ਼ੂ ਗੋਇਲ):-ਨਗਰ ਕੌਂਸਲ ਧਨੌਲਾ ਦੀਆਂ ਚੋਣਾਂ ਦੇ ਨਤੀਜੇ ਆਉਣ ਤੋਂ ਬਾਅਦ ਸ਼ਹਿਰ ਵਿੱਚ ਨਵ-ਨਿਯੁਕਤ ਕੌਂਸਲਰਾਂ ਨੂੰ ਵਧਾਈਆਂ ਦੇਣ ਦਾ ਸਿਲਸਿਲਾ ਜਾਰੀ ਹੈ। ਸ਼ਹਿਰ ਵਾਸੀ ਉਮੀਦ ਕਰ ਰਹੇ ਹਨ ਕਿ ਨਵੀਂ ਕੌਂਸਲ ਧਨੌਲਾ ਦੇ ਵਿਕਾਸ, ਸੁੰਦਰਤਾ ਅਤੇ ਲੋਕ ਭਲਾਈ ਦੇ ਕੰਮਾਂ ਨੂੰ ਹੋਰ ਗਤੀ ਦੇਵੇਗੀ।
ਚੋਣ ਨਤੀਜਿਆਂ ਅਨੁਸਾਰ 13 ਵਾਰਡਾਂ ਵਿੱਚੋਂ 8 ਸੀਟਾਂ ‘ਤੇ ਆਮ ਆਦਮੀ ਪਾਰਟੀ ਦੇ ਉਮੀਦਵਾਰ ਜੇਤੂ ਰਹੇ ਹਨ, ਜਦਕਿ 5 ਸੀਟਾਂ ਆਜ਼ਾਦ ਉਮੀਦਵਾਰਾਂ ਦੇ ਹਿੱਸੇ ਆਈਆਂ ਹਨ। ਇਸ ਬਹੁਮਤ ਦੇ ਆਧਾਰ ‘ਤੇ ਨਗਰ ਕੌਂਸਲ ਦੀ ਪ੍ਰਧਾਨਗੀ ਆਮ ਆਦਮੀ ਪਾਰਟੀ ਦੇ ਹਿੱਸੇ ਜਾਣਾ ਲਗਭਗ ਤਹਿ ਹੈ। ਹਾਲਾਂਕਿ ਪ੍ਰਧਾਨ ਦੇ ਅਹੁਦੇ ਲਈ ਕਿਸੇ ਵੀ ਪਾਰਟੀ ਜਾਂ ਅਧਿਕਾਰਤ ਧਿਰ ਵੱਲੋਂ ਹਾਲੇ ਕੋਈ ਐਲਾਨ ਨਹੀਂ ਕੀਤਾ ਗਿਆ।
ਰਾਜਨੀਤਿਕ ਗਲਿਆਰਿਆਂ ਅਤੇ ਸ਼ਹਿਰ ਦੇ ਲੋਕਾਂ ਵਿੱਚ ਸੰਭਾਵਿਤ ਪ੍ਰਧਾਨ ਦੇ ਨਾਂ ਨੂੰ ਲੈ ਕੇ ਵੱਖ-ਵੱਖ ਚਰਚਾਵਾਂ ਜਾਰੀ ਹਨ। ਵਾਰਡ ਨੰਬਰ 12 ਤੋਂ ਵੱਡੇ ਵੋਟ ਫਰਕ ਨਾਲ ਜੇਤੂ ਰਹੇ ਧਰਮਿੰਦਰ ਸਿੰਘ ਧੰਨਾ, ਵਾਰਡ ਨੰਬਰ 5 ਵਿੱਚੋਂ ਸਭ ਤੋਂ ਪੁਰਾਣੇ ਅੱਗੁ ਸਤਨਾਮ ਫਤਹਿ ਦੀ ਪਤਨੀ ਹਰਵਿੰਦਰ ਕੌਰ ਫਤਹਿ ਦਾ ਨਾਮ ਵੀ ਚਰਚਾ ਵਿੱਚ ਲਿਆ ਜਾ ਰਿਹਾ ਹੈ। ਇਸ ਤੋਂ ਇਲਾਵਾ ਪਾਰਟੀ ਦੇ ਹੋਰ ਤਜਰਬੇਕਾਰ ਅਤੇ ਸਰਗਰਮ ਆਗੂਆਂ ਦੇ ਨਾਂ ਵੀ ਲੋਕਾਂ ਦੀ ਚਰਚਾ ਦਾ ਹਿੱਸਾ ਬਣੇ ਹੋਏ ਹਨ।
ਕੁਝ ਨਗਰ ਵਾਸੀਆਂ ਦਾ ਮੰਨਣਾ ਹੈ ਕਿ ਇਸ ਵਾਰ ਕਿਸੇ ਨੌਜਵਾਨ ਆਗੂ ਨੂੰ ਪ੍ਰਧਾਨਗੀ ਦੀ ਜ਼ਿੰਮੇਵਾਰੀ ਦਿੱਤੀ ਜਾਣੀ ਚਾਹੀਦੀ ਹੈ, ਜਦਕਿ ਕੁਝ ਲੋਕ ਤਜਰਬੇਕਾਰ ਚਿਹਰੇ ਦੇ ਹੱਕ ਵਿੱਚ ਵੀ ਆਪਣੀ ਰਾਏ ਪ੍ਰਗਟ ਕਰ ਰਹੇ ਹਨ।
ਫਿਲਹਾਲ ਪ੍ਰਧਾਨਗੀ ਨੂੰ ਲੈ ਕੇ ਚੱਲ ਰਹੀਆਂ ਸਾਰੀਆਂ ਚਰਚਾਵਾਂ ਸਿਰਫ਼ ਰਾਜਨੀਤਿਕ ਅਨੁਮਾਨ ਅਤੇ ਜਨਤਕ ਵਿਚਾਰ-ਵਟਾਂਦਰੇ ਦਾ ਹਿੱਸਾ ਹਨ। ਨਗਰ ਕੌਂਸਲ ਧਨੌਲਾ ਦੇ ਪ੍ਰਧਾਨ ਦੀ ਚੋਣ ਸੰਬੰਧੀ ਅੰਤਿਮ ਫ਼ੈਸਲਾ ਕਾਨੂੰਨੀ ਅਤੇ ਪ੍ਰਸ਼ਾਸਕੀ ਪ੍ਰਕਿਰਿਆ ਪੂਰੀ ਹੋਣ ਤੋਂ ਬਾਅਦ ਹੀ ਸਪੱਸ਼ਟ ਹੋਵੇਗਾ।
ਨੋਟ:ਇਸ ਖ਼ਬਰ ਵਿੱਚ ਪ੍ਰਧਾਨਗੀ ਸੰਬੰਧੀ ਦਰਜ ਸਾਰੇ ਜ਼ਿਕਰ ਜਨਤਕ ਚਰਚਾਵਾਂ ਅਤੇ ਰਾਜਨੀਤਿਕ ਅਨੁਮਾਨਾਂ ‘ਤੇ ਆਧਾਰਿਤ ਹਨ। ਕਿਸੇ ਵੀ ਵਿਅਕਤੀ ਨੂੰ ਪ੍ਰਧਾਨ ਬਣਨ ਬਾਰੇ ਕੋਈ ਅਧਿਕਾਰਤ ਪੁਸ਼ਟੀ ਨਹੀਂ ਕੀਤੀ ਗਈ।
ਅੰਤ ਵਿੱਚ theepapers.com ਦੀ ਪੂਰੀ ਟੀਮ ਫਿਰ ਤੋਂ ਜੇਤੂ ਕੌਂਸਲਰਾਂ ਨੂੰ ਵਧਾਈ ਦਿੰਦੀ ਹੈ ਅਤੇ ਨਗਰ ਦੀ ਬਿਹਤਰੀ ਅਤੇ ਵਿਕਾਸ ਦੀ ਆਸ ਕਰਦੀ ਹੈ।
ਹੋਰ ਖ਼ਬਰਾਂ ਅਤੇ ਜਾਣਕਾਰੀ ਲਈ ਜੁੜੇ ਰਹੋ।
