🗳️ ਧਨੌਲਾ ਨਗਰ ਕੌਂਸਲ ਚੋਣਾਂ 2026: ਵਾਰਡ ਨੰਬਰ 12 ਬਣਿਆ ਦਿਲਚਸਪ ਮੁਕਾਬਲੇ ਦਾ ਕੇਂਦਰ

🗳️ ਧਨੌਲਾ ਨਗਰ ਕੌਂਸਲ ਚੋਣਾਂ 2026: ਵਾਰਡ ਨੰਬਰ 12 ਬਣਿਆ ਦਿਲਚਸਪ ਮੁਕਾਬਲੇ ਦਾ ਕੇਂਦਰ

ਆਜ਼ਾਦ ਉਮੀਦਵਾਰਾਂ ਦੀ ਭਰਮਾਰ, ‘ਝਾੜੂ’ ਅਤੇ ‘ਕਮਲ’ ਵੀ ਮੈਦਾਨ ‘ਚ

ਹਰਜੀਤ ਸਿੰਘ ਜੀਤੀ ਅਤੇ ਨਿਰਮਲ ਸਿੰਘ ਨਿੰਮਾ ਵਿਚਕਾਰ ਮੁੱਖ ਮੁਕਾਬਲਾ ਦਿਖਣ ਦੇ ਚਰਚੇ

ਚਾਹ ਦੀਆਂ ਦੁਕਾਨਾਂ ਤੋਂ ਲੈ ਕੇ ਗਲੀਆਂ-ਮੁਹੱਲਿਆਂ ਤੱਕ ਚੋਣਾਂ ਦੀ ਹੀ ਚਰਚਾ

ਧਨੌਲਾ, 24 ਮਈ (ਰਿਪੋਰਟਰ: ਹਿਮਾਂਸ਼ੂ ਗੋਇਲ) — ਨਗਰ ਕੌਂਸਲ ਧਨੌਲਾ ਦੀਆਂ 26 ਮਈ ਨੂੰ ਹੋਣ ਜਾ ਰਹੀਆਂ ਚੋਣਾਂ ਨੂੰ ਲੈ ਕੇ ਵਾਰਡ ਨੰਬਰ 12 ਵਿੱਚ ਚੋਣ ਮਾਹੌਲ ਪੂਰੀ ਤਰ੍ਹਾਂ ਗਰਮਾ ਗਿਆ ਹੈ। ਇਸ ਵਾਰ ਵਾਰਡ ਵਿੱਚ ਆਜ਼ਾਦ ਉਮੀਦਵਾਰਾਂ ਦੀ ਵੱਡੀ ਗਿਣਤੀ ਕਾਰਨ ਮੁਕਾਬਲਾ ਕਾਫ਼ੀ ਰੋਚਕ ਬਣ ਗਿਆ ਹੈ, ਜਦਕਿ ਆਮ ਆਦਮੀ ਪਾਰਟੀ ਅਤੇ ਭਾਜਪਾ ਵੀ ਆਪਣੀ ਪੂਰੀ ਤਾਕਤ ਨਾਲ ਮੈਦਾਨ ਵਿੱਚ ਹਨ।

ਵਾਰਡ ਨੰਬਰ 12 ਤੋਂ ਹਰਜੀਤ ਸਿੰਘ ਜੀਤੀ (ਟਰੱਕ), ਨਿਰਮਲਜੀਤ ਸਿੰਘ ਨਿੰਮਾ (ਟਰੈਕਟਰ), ਮੱਖਣ ਸਿੰਘ (ਬਾਲਟੀ) ਅਤੇ ਲਖਵਿੰਦਰ ਸਿੰਘ (ਕਾਰ) ਆਜ਼ਾਦ ਉਮੀਦਵਾਰ ਵਜੋਂ ਚੋਣ ਮੈਦਾਨ ਵਿੱਚ ਡਟੇ ਹੋਏ ਹਨ। ਇਸ ਦੇ ਨਾਲ ਆਮ ਆਦਮੀ ਪਾਰਟੀ ਵੱਲੋਂ ਧਰਮਿੰਦਰ ਸਿੰਘ ‘ਝਾੜੂ’ ਨਿਸ਼ਾਨ ’ਤੇ ਅਤੇ ਭਾਜਪਾ ਵੱਲੋਂ ਕੁਲਵਿੰਦਰ ਸਿੰਘ ‘ਕਮਲ ਦੇ ਫੁੱਲ’ ਨਿਸ਼ਾਨ ’ਤੇ ਚੋਣ ਲੜ ਰਹੇ ਹਨ।

ਦੂਜੇ ਪਾਸੇ ਬਹਾਦਰ ਸਿੰਘ ਵੱਲੋਂ ਆਪਣੀ ਨਾਮਜ਼ਦਗੀ ਵਾਪਸ ਲੈ ਲਈ ਗਈ ਹੈ, ਜਿਸ ਤੋਂ ਬਾਅਦ ਚੋਣੀ ਸਮੀਕਰਨਾਂ ਵਿੱਚ ਵੀ ਕੁਝ ਬਦਲਾਅ ਵੇਖਣ ਨੂੰ ਮਿਲ ਰਹੇ ਹਨ। ਵਾਰਡ ਵਿੱਚ ਉਮੀਦਵਾਰ ਘਰ-ਘਰ ਜਾ ਕੇ ਲੋਕਾਂ ਨਾਲ ਸੰਪਰਕ ਕਰ ਰਹੇ ਹਨ ਅਤੇ ਆਪਣੇ ਹੱਕ ਵਿੱਚ ਵੋਟਾਂ ਮੰਗ ਰਹੇ ਹਨ। ਜ਼ਿਕਰਯੋਗ ਹੈ ਕਿ ਪਿਛਲੇ ਦਿਨੀਂ ਲੋਕ ਸਹਿਯੋਗ ਪਾਰਟੀ ਦੇ ਗਠਨ ਕਰਨ ਨੂੰ ਲੈ ਕਿ ਚਰਚਾ ਵਿੱਚ ਆਏ ਹਰਜੀਤ ਸਿੰਘ ਜੀਤੀ ਅਤੇ ਆਪਣੇ ਸਮਾਜ ਸੇਵੀ ਐਲਾਨਾਂ ਕਰਕੇ ਨਿਰਮਲ ਸਿੰਘ ਨਿੰਮਾ ਲੋਕਾਂ ਵਿੱਚ ਅਤੇ ਵਾਰਡ ਵਿੱਚ ਖਿੱਚ ਦਾ ਕੇਂਦਰ ਬਣੇ ਹੋਏ ਹਨ।

ਸਥਾਨਕ ਲੋਕਾਂ ਅਨੁਸਾਰ ਇਸ ਵਾਰ ਵਾਰਡ ਨੰਬਰ 12 ਵਿੱਚ ਮੁਕਾਬਲਾ ਕਾਫ਼ੀ ਫਸਵਾਂ ਬਣਿਆ ਹੋਇਆ ਹੈ ਅਤੇ ਨਤੀਜੇ ਚੌਕਾਉਣ ਵਾਲੇ ਹੋ ਸਕਦੇ ਹਨ। ਚਾਹ ਦੀਆਂ ਦੁਕਾਨਾਂ ਤੋਂ ਲੈ ਕੇ ਗਲੀਆਂ-ਮੁਹੱਲਿਆਂ ਤੱਕ ਚੋਣਾਂ ਦੀ ਹੀ ਚਰਚਾ ਹੋ ਰਹੀ ਹੈ।