Himanshu Goyal 
ਐਮਐਲਏ ਕਾਲਾ ਢਿੱਲੋ ਨੇ ਵਰਤੀ ਜੁਰਅਤ,ਨਗਰ ਕੌਂਸਲ ਧਨੌਲਾ ਦੀ ਹੱਦਬੰਦੀ ਬੋਰਡ ਦੀ ਮੀਟਿੰਗ ਕਰਵਾਈ ਰੱਦ
– ਵਾਰਡਬੰਦੀ ਸਬੰਧੀ ਸਾਰੀ ਜਾਣਕਾਰੀ ਦੇਣ ਲਈ ਡਾਇਰੈਕਟਰ ਨੂੰ ਲਿਖਿਆ ਪੱਤਰ
ਬਰਨਾਲਾ ,28 ਨਵੰਬਰ (ਹਿਮਾਂਸ਼ੂ ਗੋਇਲ)-
-ਨਗਰ ਕੌਂਸਲ ਧਨੌਲਾ ਦੀ ਨਵੀਂ ਵਾਰਡਬੰਦੀ ਦੇ ਮਾਮਲੇ ਵਿੱਚ ਅਧਿਕਾਰੀਆਂ ਵੱਲੋਂ ਸੱਤਾਧਾਰੀ ਨੇਤਾਵਾਂ ਦੀ ਇਸ਼ਾਰੇ ‘ਤੇ ਕੀਤੀ ਜਾ ਰਹੀ ਧੱਕੇਸ਼ਾਹੀ ਦੇ ਖ਼ਿਲਾਫ਼ ਸਖ਼ਤ ਸਟੈਂਡ ਲੈਂਦੇ ਹੋਏ ਬਰਨਾਲਾ ਤੋਂ ਕਾਂਗਰਸੀ ਵਿਧਾਇਕ ਕੁਲਦੀਪ ਸਿੰਘ ਕਾਲਾ ਢਿੱਲੋਂ ਨੇ ਵਿਭਾਗ ਨੂੰ ਨਗਰ ਕੌਂਸਲ ਧਨੌਲਾ ਦੇ ਵਾਰਡਾਂ ਦੀ ਹੱਦਬੰਦੀ ਬੋਰਡ ਦੀ ਮੀਟਿੰਗ ਰੱਦ ਕਰਨ ਲਈ ਮਜ਼ਬੂਰ ਕਰ ਦਿੱਤਾ ਹੈ। ਜ਼ਿਕਰਯੋਗ ਹੈ ਕਿ ਡਾਇਰੈਕਟੋਰੇਟ ਸਥਾਨਕ ਸਰਕਾਰ ਵਿਭਾਗ ਪੰਜਾਬ ਵੱਲੋਂ ਮਿਤੀ 24 ਨਵੰਬਰ ਨੂੰ ਜਾਰੀ ਇੱਕ ਸਰਕੂਲੇਸ਼ਨ ਅਨੁਸਾਰ ਨਗਰ ਕੌਂਸਲ ਧਨੌਲਾ ਦੀ ਵਾਰਡਬੰਦੀ ਸਬੰਧੀ ਹੱਦਬੰਦੀ ਬੋਰਡ ਦੀ ਇੱਕ ਮੀਟਿੰਗ 27 ਨਵੰਬਰ ਨੂੰ ਚੰਡੀਗੜ੍ਹ ਵਿਖੇ ਬੁਲਾਈ ਗਈ ਸੀ ਜਿਸ ਵਿੱਚ ਵਿਧਾਇਕ ਕੁਲਦੀਪ ਸਿੰਘ ਕਾਲਾ ਢਿੱਲੋਂ ਦੇ ਨਾਲ ਡੀਸੀ ਬਰਨਾਲਾ ਜਾਂ ਉਹਨਾਂ ਵੱਲੋਂ ਨਾਮਜ਼ਦ ਨੁਮਾਇੰਦਾ, ਐਸਡੀਐਮ ਬਰਨਾਲਾ, ਪ੍ਰਧਾਨ/ਪ੍ਰਸ਼ਾਸਕ ਨਗਰ ਕੌਂਸਲ ਧਨੌਲਾ, ਏਡੀਸੀ ਜਨਰਲ ਬਰਨਾਲਾ, ਈਓ ਨਗਰ ਕੌਸਲ ਧਨੌਲਾ, ਸ੍ਰੀ ਹਰਦੀਪ ਸਿੰਘ ਪੁੱਤਰ ਭੂਰਾ ਸਿੰਘ ਵਾਸੀ ਧਨੌਲਾ, ਸ੍ਰੀ ਸੁਰਿੰਦਰ ਸਿੰਘ ਪੁੱਤਰ ਗੁਰਜੰਟ ਸਿੰਘ ਵਾਸੀ ਧਨੌਲਾ ਸਮੇਤ ਸਮੂਹ ਅਸੋਸੀਏਟ ਮੈਂਬਰ ਮਾਰਫਤ ਕਾਰਜ ਸਾਧਕ ਅਫਸਰ ਨਗਰ ਕੌਂਸਲ ਧਨੌਲਾ ਨੂੰ ਬਤੌਰ ਹੱਦਬੰਦੀ ਬੋਰਡ ਦੇ ਮੈਂਬਰ ਬੁਲਾਇਆ ਗਿਆ ਸੀ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਮਿਤੀ 27 ਨਵੰਬਰ ਨੂੰ ਚੰਡੀਗੜ੍ਹ ਵਿਖੇ ਮੀਟਿੰਗ ਵਾਲੀ ਥਾਂ ‘ਤੇ ਉਕਤ ਮੈਂਬਰਾਂ ਤੋਂ ਇਲਾਵਾ ਐਮਐਲਏ ਕੁਲਦੀਪ ਸਿੰਘ ਕਾਲਾ ਢਿੱਲੋ ਵੀ ਪੁੱਜੇ, ਜਦ ਮੀਟਿੰਗ ਦੀ ਕਾਰਵਾਈ ਸ਼ੁਰੂ ਹੋਣ ਲੱਗੀ ਤਾਂ ਐਮਐਲਏ ਕੁਲਦੀਪ ਸਿੰਘ ਕਾਲਾ ਢਿੱਲੋਂ ਨੇ ਅਧਿਕਾਰੀਆਂ ਵੱਲੋਂ ਵਾਰਡਾਂ ਦੀ ਹੱਦਬੰਦੀ ਸਬੰਧੀ ਅਪਣਾਈ ਜਾ ਰਹੀ ਪ੍ਰਕਿਰਿਆ ‘ਤੇ ਸਖ਼ਤ ਇਤਰਾਜ਼ ਕੀਤਾ। ਵਿਧਾਇਕ ਢਿੱਲੋਂ ਨੇ ਮੀਟਿੰਗ ਵਿੱਚ ਸਖ਼ਤ ਇਤਰਾਜ਼ ਜ਼ਾਹਿਰ ਕੀਤਾ ਕਿ ਉਹਨਾਂ ਨੂੰ ਅਜੇ ਤੱਕ ਵੀ ਨਗਰ ਕੌਂਸਲ ਦੇ ਧਨੌਲਾ ਦੀ ਵਾਰਡਬੰਦੀ ਸਬੰਧੀ ਲੋੜੀਂਦੀ ਜਾਣਕਾਰੀ ਜਿਵੇਂ ਕਿ ਪ੍ਰਸਤਾਵਿਤ ਨਕਸ਼ੇ, ਹੱਦਬੰਦੀ ਦਾ ਆਧਾਰ ਆਬਾਦੀ ਡਾਟਾ, ਰਿਜਰਵੇਸ਼ਨ ਮੈਟਰਿਕਸ ਜਾਂ ਤਬਦੀਲੀਆਂ ਦੇ ਤੁਲਨਾਤਮਿਕ ਚਾਰਟ ਨਹੀਂ ਭੇਜੇ ਗਏ ਹਨ। ਵਿਧਾਇਕ ਢਿੱਲੋਂ ਨੇ ਮੀਟਿੰਗ ਦੌਰਾਨ ਇਹ ਵੀ ਸਖ਼ਤ ਸਟੈਂਡ ਲਿਆ ਕਿ ਉਹ ਬਤੌਰ ਵਿਧਾਇਕ ਵਾਰਡਬੰਦੀ ਸਬੰਧੀ ਆਪਣੀ ਰਾਏ ਫੇਰ ਹੀ ਰੱਖਣਗੇ ਜਦ ਤੱਕ ਉਹਨਾਂ ਨੂੰ ਨਗਰ ਕੌਂਸਲ ਧਨੌਲਾ ਦਾ ਮੌਜੂਦਾ ਵਾਰਡ ਨਕਸ਼ਾ (ਹੱਦਬੰਦੀ ਤੋਂ ਪਹਿਲਾਂ), ਪ੍ਰਸਤਾਵਿਤ ਸੋਧਿਆ ਵਾਰਡ ਨਕਸ਼ਾ (ਹੱਦਬੰਦੀ ਤੋਂ ਬਾਅਦ), ਹੱਦਬੰਦੀ ਲਈ ਵਰਤਿਆ ਜਾਣ ਵਾਲਾ ਵਾਰਡ ਵਾਈਜ਼ ਆਬਾਦੀ ਡਾਟਾ, ਅਨੁਸੂਚਿਤ ਜਾਤੀ/ਪਛੜੀ/ਮਹਿਲਾ ਰਾਖਵਾਂਕਰਨ ਸਬੰਧੀ ਜਾਣਕਾਰੀ ਅਤੇ ਮਾਪਦੰਡ, ਆਧਾਰ, ਦਿਸ਼ਾ ਨਿਰਦੇਸ਼ ਅਤੇ ਹਰੇਕ ਵਾਰਡ ਵਿੱਚ ਕੀਤੇ ਗਏ ਬਦਲਾਅ ਦਿਖਾਉਂਦਾ ਤੁਲਨਾਤਮਿਕ ਬਿਆਨ ਤੋਂ ਇਲਾਵਾ ਅਭਿਆਸ ਨਾਲ ਸੰਬੰਧਿਤ ਕਿਸੇ ਵੀ ਸਰਵੇਖਣ ਰਿਪੋਰਟ, ਸੂਚਨਾਵਾਂ ਜਾਂ ਕਾਰਵਾਈ ਦੀਆਂ ਕਾਪੀਆਂ ਮੁਹੱਈਆਂ ਨਹੀਂ ਕਰਵਾਈਆਂ ਜਾਂਦੀਆਂ, ਉਸ ਵੇਲੇ ਤੱਕ ਉਹ ਆਪਣੀ ਕਿਸੇ ਵੀ ਤਰ੍ਹਾਂ ਦੀ ਰਾਇ ਨਹੀਂ ਦੇਣਗੇ। ਵਿਧਾਇਕ ਢਿੱਲੋਂ ਨੇ ਇਹ ਵੀ ਕਿਹਾ ਕਿ ਹੱਦਬੰਦੀ ਪ੍ਰਕਿਰਿਆ ਦੇ ਮਾਮਲੇ ‘ਚ ਕਿਸੇ ਵੀ ਪੜਾਅ ਦੌਰਾਨ ਉਹਨਾਂ ਨਾਲ ਕਦੇ ਵੀ ਕੋਈ ਸਲਾਹ ਮਸ਼ਵਰਾ ਨਹੀਂ ਕੀਤਾ ਗਿਆ ਜੋ ਕਿ ਲੋਕਤੰਤਰੀ ਅਭਿਆਸ ਅਤੇ ਸੰਵਿਧਾਨਿਕ ਭਾਵਨਾ ਦੇ ਉਲਟ ਹੈ। ਉਹਨਾਂ ਕਿਹਾ ਕਿ ਅਜਿਹੇ ਹਾਲਾਤਾਂ ‘ਚ ਹੱਦਬੰਦੀ ਪ੍ਰਕਿਰਿਆ ਨੂੰ ਜਾਰੀ ਰੱਖਣਾ ਗ਼ਲਤ ਹੋਵੇਗਾ। ਵਿਧਾਇਕ ਢਿੱਲੋਂ ਨੇ ਕਿਹਾ ਕਿ ਨਗਰ ਕੌਂਸਲ ਧਨੌਲਾ ਦੀ ਵਾਰਡਬੰਦੀ ਸਬੰਧੀ ਉਕਤ ਜਾਣਕਾਰੀ ਮੁਹੱਈਆ ਕਰਵਾਏ ਜਾਣ ਤੋਂ ਬਿਨਾਂ ਇਸ ਸੰਵੇਦਨਸ਼ੀਲ ਲੋਕਤੰਤਰੀ ਅਭਿਆਸ ‘ਤੇ ਕੋਈ ਰਾਇ ਬਣਾਉਣਾ ਨਾ ਤਾਂ ਪ੍ਰਸ਼ਾਸਨਿਕ ਤੌਰ ‘ਤੇ ਸੰਭਵ ਹੈ ਤੇ ਨਾ ਹੀ ਸੰਵਿਧਾਨਿਕ ਤੌਰ ‘ਤੇ ਉਚਿਤ ਹੈ। ਇਸ ਮਾਮਲੇ ਸਬੰਧੀ ਮੌਕੇ ‘ਤੇ ਹੀ ਵਿਧਾਇਕ ਢਿੱਲੋ ਨੇ ਡਾਇਰੈਕਟਰ ਸਥਾਨਕ ਸਰਕਾਰਾਂ ਵਿਭਾਗ ਨੂੰ ਆਪਣੇ ਵੱਲੋਂ ਇੱਕ ਪੱਤਰ ਵੀ ਲਿਖਿਆ ਕਿ ਜਦੋਂ ਤੱਕ ਸੰਬੰਧਤ ਸਮਗਰੀ ਉਹਨਾਂ ਨੂੰ ਪ੍ਰਦਾਨ ਨਹੀਂ ਕੀਤੀ ਜਾਂਦੀ ਅਤੇ ਇਸ ਦੀ ਸਹੀ ਢੰਗ ਨਾਲ ਜਾਂਚ ਨਹੀਂ ਕੀਤੀ ਜਾਂਦੀ ਉਸ ਵੇਲੇ ਤੱਕ ਹੱਦਬੰਦੀ ਬੋਰਡ ਦੀ ਕੋਈ ਵੀ ਮੀਟਿੰਗ ਨਾ ਕੀਤੀ ਜਾਵੇ ਅਤੇ ਇਹ ਮੀਟਿੰਗ ਵੀ ਮੁਲਤਵੀ ਕੀਤੀ ਜਾਵੇ। ਵਿਧਾਇਕ ਢਿੱਲੋ ਦੇ ਇਰਾਦੇ ਨੂੰ ਭਾਂਪਦਿਆਂ ਹੋਇਆ ਅਤੇ ਉਨਾਂ ਦੇ ਇਤਰਾਜ਼ ‘ਤੇ ਕੰਨ ਧਰਦੇ ਹੋਏ ਵਿਭਾਗੀ ਅਧਿਕਾਰੀਆਂ ਨੇ ਮੌਕੇ ‘ਤੇ ਹੀ ਨਗਰ ਕੌਂਸਲ ਧਨੌਲਾ ਦੇ ਹੰਦਬੰਦੀ ਬੋਰਡ ਦੀ ਮੀਟਿੰਗ ਅਗਲੇਰੇ ਹੁਕਮਾਂ ਤੱਕ ਰੱਦ ਕਰ ਦਿੱਤੀ।
