ਬਰਨਾਲਾ ਸਿਵਲ ਹਸਪਤਾਲ ਦੇ ਡਾ. ਦੀਪ ਲੇਖ ਬਾਜਵਾ ਨੇ ਮੌਤ ਦੇ ਮੂੰਹੋਂ ਕੱਢਿਆ ਮਰੀਜ਼

ਸਿਵਲ ਹਸਪਤਾਲ ਬਰਨਾਲਾ ਵਿਖੇ ਤਾਇਨਾਤ ਐਮ.ਡੀ. ਮੈਡੀਸਨ ਡਾ. ਦੀਪ ਲੇਖ ਬਾਜਵਾ ਦੀ ਤੁਰੰਤ ਕਾਰਵਾਈ ਅਤੇ ਮੈਡੀਕਲ ਮੁਹਾਰਤ ਸਦਕਾ ਇੱਕ ਮਰੀਜ਼ ਨੂੰ ਨਵੀਂ ਜ਼ਿੰਦਗੀ ਮਿਲੀ ਹੈ। ਸ਼ਹਿਰ ਦੇ ਮਸ਼ਹੂਰ ਪੱਪੂ ਜੂਸ ਕਾਰਨਰ ‘ਤੇ ਕੰਮ ਕਰਨ ਵਾਲਾ ਇੱਕ ਮੁਲਾਜ਼ਮ ਅਚਾਨਕ ਦਿਲ ਦਾ ਦੌਰਾ (Cardiac Arrest) ਪੈਣ ਕਾਰਨ ਹਸਪਤਾਲ ਦੀ ਓ.ਪੀ.ਡੀ. ਦੇ ਬਾਹਰ ਬੇਹੋਸ਼ ਹੋ ਕੇ ਡਿੱਗ ਪਿਆ।
ਜਾਂਚ ਦੌਰਾਨ ਮਰੀਜ਼ ਦੀ ਨਬਜ਼ (Pulse) ਬੰਦ ਹੋ ਚੁੱਕੀ ਸੀ ਅਤੇ ਦਿਲ ਨੇ ਕੰਮ ਕਰਨਾ ਬੰਦ ਕਰ ਦਿੱਤਾ ਸੀ। ਹਾਲਤ ਦੀ ਗੰਭੀਰਤਾ ਨੂੰ ਦੇਖਦਿਆਂ ਡਾ. ਬਾਜਵਾ ਨੇ ਬਿਨਾਂ ਸਮਾਂ ਗਵਾਏ ਮਰੀਜ਼ ਨੂੰ ਐਮਰਜੈਂਸੀ ਵਾਰਡ ਵਿੱਚ ਸ਼ਿਫਟ ਕਰਵਾਇਆ।
ਕੀਤੀ ਗਈ ਐਮਰਜੈਂਸੀ ਕਾਰਵਾਈ:
ਡੀਫਿਬ੍ਰਿਲੇਸ਼ਨ ਤੇ ਐਡਵਾਂਸਡ ਲਾਈਫ ਸਪੋਰਟ: ਐਮਰਜੈਂਸੀ ਵਿੱਚ ਤੁਰੰਤ ਡੀਫਿਬ੍ਰਿਲੇਟਰ ਰਾਹੀਂ ਬਿਜਲੀ ਦੇ ਝਟਕੇ (Shocks) ਦਿੱਤੇ ਗਏ ਅਤੇ ਜ਼ਰੂਰੀ ਐਮਰਜੈਂਸੀ ਟੀਕੇ ਲਗਾਏ ਗਏ, ਜਿਸ ਨਾਲ ਮਰੀਜ਼ ਦਾ ਰਿਦਮ ਅਤੇ ਨਬਜ਼ ਮੁੜ ਬਹਾਲ ਹੋਈ।
ਏਅਰਵੇਅ ਮੈਨੇਜਮੈਂਟ: ਅਨੱਸਥੀਸੀਆ ਮਾਹਿਰ ਡਾਕਟਰਾਂ ਦੀ ਟੀਮ ਨੂੰ ਬੁਲਾ ਕੇ ਮਰੀਜ਼ ਨੂੰ ਤੁਰੰਤ ਐਂਡੋਟ੍ਰੈਕੀਅਲ ਟਿਊਬ (ਸਾਹ ਵਾਲੀ ਨਾਲੀ) ਰਾਹੀਂ ਮਕੈਨੀਕਲ ਆਕਸੀਜਨ ਸਪੋਰਟ ਦਿੱਤੀ ਗਈ।
ਸੁਰੱਖਿਅਤ ਰੈਫ਼ਰਲ ਪ੍ਰਬੰਧ: ਮਰੀਜ਼ ਦੀ ਹਾਲਤ ਕੁਝ ਸਥਿਰ ਹੁੰਦਿਆਂ ਹੀ ਆਕਸੀਜਨ ਸਿਲੰਡਰਾਂ ਨਾਲ ਲੈਸ ਵਿਸ਼ੇਸ਼ ਐਂਬੂਲੈਂਸ ਰਾਹੀਂ ਉਸ ਨੂੰ ਉਚੇਰੇ ਇਲਾਜ ਲਈ ਏਮਜ਼ (AIIMS) ਬਠਿੰਡਾ ਰੈਫ਼ਰ ਕਰ ਦਿੱਤਾ ਗਿਆ।
ਏਮਜ਼ ਬਠਿੰਡਾ ਵਿਖੇ ਕਾਰਡੀਓਲੋਜੀ ਟੀਮ ਵੱਲੋਂ ਮਰੀਜ਼ ਨੂੰ ਵੈਂਟੀਲੇਟਰ ‘ਤੇ ਰੱਖ ਕੇ ਤੁਰੰਤ ਐਮਰਜੈਂਸੀ ਐਂਜੀਓਪਲਾਸਟੀ ਕਰਦੇ ਹੋਏ ਸਟੈਂਟ ਪਾਇਆ ਗਿਆ। ਸਮੇਂ ਸਿਰ ਮਿਲੇ ਮੁੱਢਲੇ ਕਲੀਨਿਕਲ ਰਿਸਪਾਂਸ ਸਦਕਾ ਮਰੀਜ਼ ਪੂਰੀ ਤਰ੍ਹਾਂ ਸਿਹਤਯਾਬ ਹੋ ਗਿਆ ਹੈ ਅਤੇ ਇੱਕ ਹਫ਼ਤੇ ਦੇ ਇਲਾਜ ਮਗਰੋਂ ਉਸ ਨੂੰ ਹਸਪਤਾਲ ਤੋਂ ਛੁੱਟੀ ਦੇ ਕੇ ਬਰਨਾਲਾ ਘਰ ਭੇਜ ਦਿੱਤਾ ਗਿਆ ਹੈ।

---